David Furnish, bashkëshorti i muzikantit legjendar Elton John, ka folur së fundmi për periudhën e vështirë që artisti po kalon për shkak të problemeve me shikimin. Në një intervistë për revistën “Variety”, ai tregoi se këngëtari po përballet me sfida të mëdha, por vazhdon të luftojë dhe të mos humbasë shpresën.

Problemet shëndetësore nisën në korrik të vitit 2024, kur Elton John u përball me një infeksion të rëndë në sy. Si pasojë, ai humbi pothuajse plotësisht shikimin në syrin e djathtë, ndërsa edhe syri i majtë është prekur ndjeshëm.

Vetë artisti ka pranuar më herët se muajt e fundit kanë qenë ndër më të vështirët në jetën e tij. Ai ka treguar se për një kohë të gjatë mezi shihte dhe nuk ishte në gjendje të lexonte, gjë që e ka bërë situatën edhe më të vështirë për të. Megjithatë, sipas David Furnish, pavarësisht këtyre sfidave, Elton John po përpiqet të ruajë optimizmin dhe të fokusohet tek ajo që ka më shumë rëndësi në jetën e tij: familja.

Këngëtari po kalon shumicën e kohës në shtëpi me partnerin e tij dhe dy djemtë e tyre, Zachary dhe Elijah, duke shijuar momentet pranë familjes.

“Ai është mirë. Nuk është një situatë e lehtë për të, por po përpiqet të ecë përpara. Është i lumtur që kalon kohë në shtëpi me familjen. Ne e duam jetën si prindër dhe momentet që ndajmë së bashku,” u shpreh Furnish.

Elton John është përballur me disa sfida shëndetësore gjatë viteve, por gjithmonë ka ruajtur një qëndrim pozitiv. Artisti ka shprehur shpresën se zhvillimet në fushën e mjekësisë mund të sjellin në të ardhmen një zgjidhje për problemet e tij me shikimin.