Rita Ora po përballet me një betejë ligjore me ish-menaxheren e saj, Sarah Stennett, e cila pretendon se kompanisë së saj, FAE Ventures, i detyrohen më shumë se 3.2 milionë paund.

Sipas dokumenteve të depozituara në Gjykatën e Lartë në Mbretërinë e Bashkuar, kompania pretendon se këngëtarja nuk ka respektuar disa nga kushtet e kontratës, duke mos deklaruar një pjesë të të ardhurave nga turnetë, koncertet dhe angazhimet televizive.

Stennett e menaxhoi Ritën që prej vitit 2009 dhe u nda profesionalisht me të në vitin 2024. Tashmë, marrëdhënia mes tyre ka kaluar nga bashkëpunimi i gjatë në një përballje gjyqësore. Pjesa më e madhe e shumës së kërkuar, mbi 1.7 milionë paund, lidhet me zbritje që FAE Ventures i konsideron të palejueshme për shërbime si reklamat, kontabiliteti dhe sigurimet. Kompania pretendon gjithashtu se më shumë se 1.1 milionë paund të ardhura nga “Phoenix World Tour” nuk janë raportuar.

Në çështje përfshihen edhe të ardhurat nga koncertet dhe angazhimi i Ritës si anëtare e jurisë në “The Masked Singer”. Sipas kompanisë së Stennett, disa prej këtyre të ardhurave nuk janë pasqyruar saktë në deklarimet financiare.

Për të verifikuar pretendimet, financat e këngëtares janë audituar për periudhën nga korriku 2018 deri në qershor 2024. Megjithatë, pala e ish-menaxheres pretendon se nuk ka marrë të gjitha dokumentet e kërkuara.