Vrasja e Arlinda Zekajt në Pejë ka rikthyer në vëmendje dhunën ndaj grave dhe përgjegjësinë e institucioneve për mbrojtjen e tyre. Mes reagimeve të shumta, modelja Arbenita Ismajli ka ndarë një mesazh të fortë, përmes të cilit u bën thirrje grave të mos lejojnë që mentaliteti patriarkal të diktojë zgjedhjet e jetës së tyre.

Përmes disa postimeve në Instagram, Arbenita ka kritikuar pritshmëritë shoqërore që, sipas saj, i shtyjnë gratë drejt martesës dhe amësisë, pa marrë parasysh dëshirat e tyre. Ajo ka kërkuar gjithashtu që gratë të mos sakrifikojnë pavarësinë për një sistem që nuk u garanton mbrojtje.

“Oj femra, mjaft u dhatë pushtet burrave mbi jetët tuaja! Mos u martoni, mos bëni fëmijë vetëm sepse kështu e kërkon shoqëria”, shkruan modelja në mesazhin e publikuar.

Reagimi i saj nuk është kufizuar vetëm te kritikat ndaj mentalitetit patriarkal. Arbenita ka folur edhe për përvojën e saj me institucionet e drejtësisë në Kosovë, duke pranuar se ka humbur besimin te gjykatat, prokuroria dhe Qendra për Punë Sociale.

“Kjo është pikërisht arsyeja pse unë, si nënë, humba besimin te gjykatat, prokuroria dhe Qendra për Punë Sociale atje”, shprehet ajo, duke iu referuar përvojës së saj personale dhe shqetësimeve për sigurinë e vetes dhe të vajzës.

Modelja thotë se vendosi të merrte vetë përgjegjësinë për mbrojtjen e tyre, pasi, sipas saj, institucionet nuk i kishin trajtuar me seriozitet frikën, traumën dhe mirëqenien psikologjike të fëmijës.

“Si nënë, refuzova ta lë fatin e fëmijës tim në duart e një sistemi që nuk na dha siguri. As unë, as fëmija im nuk duhet të përfundojmë viktima që institucionet më në fund të na marrin seriozisht”, ka shkruar Arbenita.

Ajo e ka mbyllur reagimin me një kritikë të drejtpërdrejtë ndaj mënyrës se si funksionon sistemi i drejtësisë, duke theksuar se ndërhyrja pas një tragjedie nuk mund të zëvendësojë mbrojtjen në kohën e duhur.

“Drejtësia që vjen pas tragjedisë nuk është drejtësi. Është dëshmi e dështimit të një shteti që duhej të na mbronte”, përfundon modelja.

Reagimi vjen në një periudhë kur historia personale e Arbenitës ka qenë prej vitesh në vëmendjen e mediave, për shkak të përplasjeve me ish-bashkëshortin e saj, reperin Fero, dhe çështjeve ligjore që lidhen me marrëdhënien e tyre pas ndarjes dhe vajzën Nina.

Në korrik të vitit 2023, Fero u arrestua nën dyshimet për dhunë në familje ndaj Arbenitës. Në vitin 2025, Prokuroria Themelore në Gjilan ngriti aktakuzë ndaj tij për dhunë në familje, ngacmim seksual dhe kanosje, për veprime të dyshuara gjatë vitit 2024. Këto akuza nuk përbëjnë, në vetvete, një vendim përfundimtar fajësie.