Raporti mes Ori Nebijajt dhe Arbana Osmanit duket se ka ende disa gjëra të pathëna. Ori pranoi publikisht se ishte zhgënjyer nga ish-kolegia e saj, ndërsa një postim i Arbanës në rrjetet sociale ka shtuar dyshimet se mesazhi mund të ketë qenë një kundërpërgjigje.

Gjithçka nisi në emisionin “Goca dhe Gra”, ku gjatë një bisede me Jonida Maliqin, Ori u pyet për personazhet e njohur që, sipas saj, shfaqin një anë në ekran dhe një tjetër në jetën reale.

Emri që përmendi ishte Arbana Osmani, për të cilën moderatorja nuk i kurseu kritikat.

“Një nga personazhet e medias që realisht për mua është tjetër gjë në ekran dhe është tjetër gjë si individ, është Arbana Osmani, që më ka zhgënjyer”, u shpreh ajo.

Nga ana tjetër, Arbana publikoi një shprehje në rrjetet sociale, e cila mund të jetë një mesazh mbi deklaratën e Orit.

“Njoh njerëz që më mbajnë mëri për gjëra që ata vetë më kanë bërë mua”, shkruhej në postimin e saj.

Arbana nuk përmendi emra, ndaj nuk ka asnjë konfirmim se shprehja lidhet me Ori Nebijajn. Megjithatë, përkimi në kohë me deklaratën e kësaj të fundit nuk kaloi pa u vënë re.