“Si shkencëtar, e di që shkenca mund të përparojë vetëm nëse njerëzit pranojnë të marrin pjesë në programe si ky. Unë punoj në inteligjencën artificiale dhe jam i hapur për të provuar gjëra të reja”, ky ishte mesazhi i 67-vjeçarit britanik Januz Rush, pacienti i parë që mori vaksinën kundër kancerit të mushkërive.

“Shpresoj se vaksina do të luftojë qelizat e kancerit dhe trajtimi do të jetë efektiv”, shtoi 67-vjeçari që jeton në Londër.

Mendimi se trajtimi mund të shpëtojë mijëra jetë dhe të bëhet më i njohur dhe i disponueshëm në të ardhmen është ajo që e shtyn atë të adoptojë inovacionin shkencor. Pacienti në Spitalin Universitar të Londrës mori vaksinën, e cila është krijuar për të nxitur sistemin imunitar për të njohur dhe luftuar qelizat e kancerit. Është hera e parë që ky trajtim nga kompania gjermane e bioteknologjisë BioNTech testohet tek një pacient me kancer. Vaksina, e njohur si BNT116 nga BioNTech, është projektuar për të luftuar qelizat e kancerit duke parandaluar përsëritjen e tyre.

Prova klinike e fazës 1, studimi i parë i BNT116 te njerëzit, ka filluar në 34 institucione kërkimore në shtatë vende: Mbretëria e Bashkuar, Shtetet e Bashkuara, Gjermania, Hungaria, Polonia, Spanja dhe Turqia