Wanda Kagan u takua me Kamala Harris gjatë një ngjarje kulturore të komunitetit në Montreal. Të dyja ishin adoleshente dhe prej atij momenti ato e ruajtën shoqërinë e tyre. Sot Harris është zyrtarisht kandidate për presidente në SHBA. Në tubimin e parë që mbajti para mbështetësve të saj, Harris, foli për prindërit, se si kanë luftuar për të drejtat civile. Ajo tregoi një prej mësimeve që i ka dhënë nëna gjatë jetës së saj që ishte: “të mos ankohej kurrë për padrejtësinë, por të bënte diçka për të”.

Ajo e mori këtë këshillë për zemër ndërsa ndoqi shkollën e mesme Westmount në Montreal në fund të viteve 1970 dhe në fillim të viteve 1980. Shoqja e saj më e mirë në atë kohë, Wanda Kagan, i tha Harrisit se po abuzohej seksualisht nga njerku i saj. Harris insistoi menjëherë që Kagan të qëndronte me të dhe prindërit e saj.

Në fjalimin e saj, Harris e quajti këtë moment, si ndër më të rëndësishmit në jetën e saj.

“Kjo është një nga arsyet pse u bëra prokurore, për të mbrojtur njerëz si Wanda, sepse besoj se të gjithë kanë të drejtë të jetojnë të sigurt, dinjitetit dhe drejtësi,” tha Harris.

Harris më parë postoi një video duke diskutuar historinë në mediat sociale para se të bëhej nënkryetare. Kagan tani punon si filantrope (person i cili i do njerëzit dhe kujdeset për ta, për t’iu mundësuar një jetë më të lumtur).

Kagan dhe Harris u bashkuan me njëra-tjetrën në adoleshencë, për shkak të prejardhjeve të tyre. Harris është Xhamajka dhe India, ndërsa babai i Kagan ishte me ngjyrë dhe nëna e saj ishte një hebre. Së bashku, themeluan një trupë kërcimi të quajtur Midnight Magic. Ato morën pjesë në shfaqjet e modës dhe aktivitete të shkollës, duke punuar në komitete. Pasi Kagan i tha Harrisit për abuzimin me të cilin po përballej, ato përfunduan duke ndarë të njëjtën dhomë në shtëpinë e Harris.

“Nëna dhe motra e saj më përqafuan. Unë jam ende shumë mirënjohëse”, shprehet Kagan.

Harris vazhdoi studimet në Shtetet e Bashkuara dhe pas këtij momenti humbi kontaktin me Kagan. Vetëm kur Harris u shfaq në Oprah Winfrey Show në 2005, Kagan vendosi ta kontaktojë. Që atëherë ato kanë mbajtur kontakt.

Përpara se të bënte publike detajet e abuzimit të Kagan, stafi i fushatës së Harris në atë kohë u konsultua me të.