“Big Brother VIP Albania” është një nga formatet që, çdo herë që nis, bën zhurmë, krijon meme, debate dhe përplasje që komentohen gjatë. Por këtë vit, ndryshe nga zakonisht, gjithçka është në heshtje totale.

Në katër sezonet e kaluara, “BBVIP” ka nisur gjithmonë diku mes tetorit dhe janarit. Pra, sipas llogarive, në këtë periudhë do të duhej të kishim parë tashmë ndonjë promo, një listë të pjesshme konkurrentësh, apo të paktën ndonjë “teaser” misterioz nga produksioni.

Mes gjithë këtij misteri, një detaj i vogël nga Lori Hoxha, producentja e “Big Brother VIP”, tërhoqi vëmendjen. Në pamje të parë, mund të duket thjesht si art modern, por nga ana tjetër, syri është simboli i programit. Deri tani, as Lori dhe as Top Channel nuk kanë dhënë një njoftim zyrtar, por kemi mësuar se kur Lori nis të postojë, asgjë nuk është rastësore.

Pra, po vjen apo jo sezoni i pestë? Zyrtarisht, ende jo. Por jozyrtarisht, çdo shenjë tregon se përgatitjet mund të kenë nisur.