Vajza e aktorit të njohur Tommy Lee Jones, Victoria Kafka Jones, u gjet e vdekur në San Francisko në natën e Vitit të Ri, në moshën 34-vjeçare. Ajo u gjet pa ndjenja në një hotel luksoz më 1 janar dhe më pas u shpall e vdekur në vendngjarje.

Raportohet se Victoria ishte parë duke përdorur kokainë para vdekjes. Sipas TMZ, një dëshmitar ka informuar ekipet e emergjencës se ajo kishte përdorur kokainë pak para se të ndërronte jetë. Burime nga forcat e rendit i kanë thënë medias se, kur mbërritën në vendngjarje, buzët dhe thonjtë e saj kishin një ngjyrë blu, në hotelin luksoz Fairmont në San Francisko. Të njëjtat burime kanë shpjeguar se dyshimet e para lidhen me një mbidozë.

Burime të TMZ shtuan gjithashtu se Victoria ndodhej në hotelin Fairmont në shoqërinë e “një grupi prej tre ose katër personash” dhe se ata po festonin ndërrimin e viteve.

Kalimtarë të rastit i dhanë ndihmën e parë duke kryer reanimim kardiopulmonar (CPR), ndërsa ekipet paramjekesore u përpoqën ta rikthenin në jetë sapo mbërritën në vendngjarje, por ajo u shpall e vdekur në vend. Shkaku zyrtar i vdekjes ende nuk është përcaktuar, ndërsa Departamenti i Policisë së San Franciskos ka bërë të ditur se nuk janë konstatuar shenja që të tregojnë për vetëvrasje.