Ermal Mamaqi ka ndarë një tjetër mënyrë të pazakontë të edukimit të fëmijëve gjatë intervistës së tij në “Grida Duma Podcast”, duke treguar se në familjen e tij shmangen frazat negative si “nuk kemi lekë” dhe inkurajohen fëmijët të gjejnë zgjidhje dhe të arrijnë qëllimet e tyre.

“Unë nuk i them asnjëherë ‘nuk e përballojmë dot’ ose ‘s’kemi lekë’. Edhe kur nuk kemi, fraza që përdor është: si mund ta gjejmë mundësinë që ta blejmë këtë gjë?”, tha Mamaqi. Ai shtoi se në familjen e tij fëmijët motivohen financiarisht për leximin dhe angazhimet në shtëpi.

“Kur lexon një libër, merr një vlerë. Këto para i grumbullojnë dhe i shpenzojnë si të duan”, tregoi aktori.

Mamaqi ndau edhe një episod kur djali i tij kërkonte një pajisje që kushtonte rreth 500 euro.

“Nuk i dilnin lekët dhe një ditë më thotë: e gjeta zgjidhjen, duhet të më japësh kredi. Bëmë llogaritë dhe i thashë: nuk do më kthesh 500, por 550, me 10% interes, si në bankë. Filloi të thoshte duhet të punoj më shumë sepse kam kredi. Ishte hera e parë që kuptoi përgjegjësinë financiare”, u shpreh ai.

Sipas Mamaqit, këto metoda ndihmojnë fëmijët të kuptojnë vlerën e parave dhe përgjegjësinë që sjell çdo vendim financiar, duke i përgatitur për sfidat reale të së ardhmes.