Andrew Mountbatten-Windsor, i njohur më parë si Princi Andrew, është arrestuar këtë të enjte nën dyshimet për “shpërdorim të detyrës publike”, pas javësh presioni dhe shqyrtimi publik lidhur me marrëdhënien e tij me financierin e ndjerë dhe të dënuar për krime seksuale, Jeffrey Epstein.

Sipas autoriteteve, oficerë të Thames Valley Police u fotografuan duke mbërritur në rezidencën e Andrew në ditën e 66-të të lindjes së tij. Policia konfirmoi arrestimin e një burri 66-vjeçar në jug të Anglisë dhe bëri të ditur se po kryente kontrolle në dy adresa në Berkshire dhe Norfolk, por nuk e përmendi emrin e të arrestuarit, duke iu referuar udhëzimeve kombëtare.

Presioni ndaj Andrew, vëllait të mbretit Charles III dhe djalit të së ndjerës Elizabeth II, është shtuar ndjeshëm për shkak të miqësisë së tij shumëvjeçare me Epstein. Më herët gjatë këtij muaji, Thames Valley Police njoftoi se po bashkëpunonte me specialistë të Crown Prosecution Service për të përcaktuar nëse kishte bazë për hapjen e një hetimi penal ndaj tij.

Mountbatten-Windsor ka mohuar vazhdimisht çdo keqbërje në lidhje me raportin e tij me Epstein, duke deklaruar se e pendon miqësinë me të, por duke theksuar se nuk ka kryer asnjë shkelje ligjore.