Nëse ke flokë të hollë, e di sa e vështirë është t’i bësh të duken me volurm. Por një trend i ri po bën xhiron e rrjeteve dhe premton pikërisht këtë: më shumë trashësi, pa shumë mundim.

Nihet si “peekaboo bob” dhe po kthehet në një nga modelet më të kërkuara të momentit.

Çfarë është “peekaboo bob”?

“Peekaboo bob” është një model flokësh që kombinon prerjen bob me një kontrast ngjyrash. Pjesët e përparme të flokëve zbardhen në bionde, ndërsa pjesa tjetër mbetet më e errët. Fijet e çelura fshihen poshtë flokëve më të errët, duke dalë vetëm paksa në pah, si një efekt “peekaboo” (referuar lojës së fëmijëve, kukafshehtas, që nënkupton diçka që është e fshehur, por që duket paksa herë pas here).

Pse funksionon për flokët e hollë?

Sekreti nuk është vetëm ngjyra, por edhe prerja. Prerja bob, sidomos pa shkallëzim, ndihmon që flokët të duken më të dendur, sepse krijon volum në një nivel të vetëm.

Gjithashtu, kontrasti i ngjyrave shton dimension dhe krijon një iluzion optik, duke i bërë flokët të duken më të dendur. Duke qenë se pjesët bionde janë të fshehura, rrënja nuk bie shumë në sy, kështu që nuk ke nevojë për mirëmbajtje të shpeshtë.

Si t’i mirëmbani flokët në këtë model?

– bëje zbardhjen gjithmonë te një profesionist
– përdor sa më pak pajisjet e nxehta
– mos i laj flokët shumë shpesh (1–2 herë në javë mjafton)
– përdor produkte që hidratojnë dhe riparojnë flokun