Belgjika është bërë vendi i parë në Europë që ndalon shitjen e cigareve elektronike të njohura si “Puff”. Ky vendim, i marrë nga Ministria e Shëndetësisë belge, ka hyre në fuqi më 1 janar 2025 dhe synon të frenojë përhapjen e këtyre produkteve, veçanërisht mes të rinjve.

“Puff”-at janë cigare elektronike të vogla dhe të lehta për t’u përdorur, që ngjasojnë me një USB dhe ofrojnë aroma të ndryshme, si p.sh. aromën e sheqerit të karamelizuar. Përmbajtja e tyre përfshin rreth 2% nikotinë, dhe çmimi varion nga 8 deri në 15 euro, në varësi të numrit të “thithjeve” që ofron secila pajisje. Pasi konsumohen, ato hidhen, duke ngritur shqetësime jo vetëm për shëndetin publik, por edhe për ndotjen mjedisore.

Këto produkte janë kritikuar si një “portë hyrëse” drejt varësisë nga nikotina dhe përdorimit të duhanit tradicional. Gjithashtu, ato janë bërë shumë të popullarizuara mes adoleshentëve, të cilët i përdorin shpesh fshehurazi prindërve, mësuesve dhe të rriturve.

Belgjika shpreson që ndalimi i “Puff”-ave të nxisë edhe vende të tjera të ndjekin të njëjtin shembull, duke mbrojtur më mirë të rinjtë nga dëmet e mundshme të këtyre produkteve.