Kalifornia ka miratuar një ligj të ri që ndalon reklamat me volum të lartë në platformat streaming si Netflix, Hulu, Prime Video dhe YouTube, në përpjekje për të mbrojtur shikuesit nga shpërthimet e papritura të zërit gjatë përmbajtjes së transmetuar.

Ligji i ri, i quajtur SB 576, u nënshkrua nga guvernatori Gavin Newsom dhe pritet të hyjë në fuqi më 1 korrik 2026. Ai synon të ndalojë që reklamat të transmetohen me volum më të lartë se programet që i paraprijnë apo i pasojnë ato, duke vendosur një standard të ri për përvojën e përdoruesit në platforma dixhitale.

SB 576 zgjeron logjikën e “CALM Act” – një ligj federal i vitit 2010 që rregullonte volumin e reklamave në televizionet tradicionale dhe kabllore, por nuk mbulonte shërbimet e transmetimit online, të cilat ndër vite janë kthyer në burimin kryesor të përmbajtjes për miliona përdorues.

Autor i projektligjit është senatori Tom Umberg, i cili tha se e gjithë nisma nisi pas një ankese nga një qytetar që shprehej se reklamat e zhurmshme në platformat streaming po zgjonin foshnjën e tij gjatë natës.

Ligji detyron platformat të sigurohen që reklamat e tyre të përmbushin standarde të balancuara audio, duke shmangur ndryshimet e papritura të volumit. Megjithatë, ekspertë të industrisë kanë shprehur shqetësime për zbatimin teknik të ligjit, pasi reklamat shpesh vijnë nga burime të jashtme dhe jo gjithmonë kontrollohen direkt nga platformat.

Pavarësisht sfidave teknike, Kalifornia bëhet shteti i parë që vendos një standard të tillë për platformat streaming, me gjasa që ky ligj të shërbejë si model për shtete të tjera në të ardhmen.