Imagjinata e mashtruesve nuk njeh kufij. Mashtrimi për të përfituar nga të tjerët duket një ide e mirë dhe WhatsApp aktualisht duket të jetë platforma e preferuar e mashtruesve.

Megjithatë, nuk duhet shumë për të shmangur mashtrimin. Shumica e mashtrimeve bazohen në të njëjtën skemë. Përdoruesi merr një mesazh tekst që përmban një lidhje nga një  kontakt i besuar.

Pas hapjes së lidhjes, viktimës i paraqitet një faqe ku ai fut numrin e tij të telefonit dhe një kod të marrë me anë të SMS-s.  Mashtruesit më pas marrin kontrollin e llogarisë WhatsApp të viktimës dhe vazhdojnë aktivitetin e tyre kriminal duke mashtruar të tjerët. Ja mashtrimet që përdorin këtë mekanizëm.

Mashtrimi me balerinën

Skema e mashtrimit është e thjeshtë. Përdoruesi merr një mesazh nga një numër tashmë i regjistruar në rubrikë dhe që, me shumë gjasë, i përket një të afërmi ose të njohuri. Teksti zakonisht thotë:

“Përshëndetje (emri)! Nëse ke mundësi, a mund t’i japësh një votë Francescës (ose një emri tjetër)? Është vajza e disa miqve tanë të ngushtë dhe për të do të ishte shumë e rëndësishme. Çmimi është një kurs vallëzimi falas”.

Mesazhi shoqërohet me një imazh të balerinës së supozuar dhe me një link që, nëse klikohet, e çon përdoruesin në një platformë që duket si një portal i rregullt. Viktima fut numrin e telefonit dhe një kod që i vjen me SMS. Pikërisht në këtë moment mashtrimi hyn në fazën vendimtare dhe kriminelët marrin kontrollin e llogarisë WhatsApp të viktimës.

Mashtrimi i “mbesës” dhe bursa e studimit

Ashtu si mashtrimi i “balerinës”, edhe ai i “mbesës” bazohet në një mesazh me tekst që përmban një link dhe që duket se vjen nga një kontakt i besuar.

“Përshëndetje (emri), të lutem mbështet kushërirën time Liana në këtë konkurs shumë të rëndësishëm për të! Ka mundësinë të fitojë një vit arsim falas dhe çdo votë ka shumë rëndësi. Faleminderit shumë!”, shkruan Tgcom.

I prekur nga ideja se një e re mund të fitojë një bursë studimi me një klikim të thjeshtë, përdoruesi klikon mbi linkun. Ashtu si në rastin e parë, ai ridrejtohet në një portal (të rremë) hyrjeje, ku fut numrin e telefonit dhe kodin e marrë me SMS. Edhe në këtë rast, mashtrimi realizohet dhe llogaria e tij përvetësohet nga autorët.

Kërkesat për para për të paguar dentistin

“Përshëndetje (emri), a mund të më huazosh një mijë euro? Duhet të paguaj urgjentisht dentistin dhe kam probleme me kartën. Do t’i kthej sonte.”

Së bashku me mesazhin, përdoruesi merr edhe të dhënat bankare ku mund të bëjë transfertën, me qëllim që “miku” apo “i afërmi” të përballojë shpenzimin për dentistin. Ajo që e mashtron viktimën është fakti që kërkesa duket se vjen nga një kontakt i ruajtur në rubrikë.

Mashtrimet “romantike”

Mashtrimet sentimentale shfrytëzojnë ndjenjat dhe emocionet e viktimës. Zakonisht, mashtruesi krijon një profil të rremë në rrjete sociale, si për shembull Facebook, dhe nis një lidhje online me personin e synuar. Më pas biseda zhvendoset në WhatsApp, transmeton Piranjat.

Në këtë pikë, pasi krijohet një marrëdhënie besimi, mashtruesi fillon të kërkojë para për emergjenca shëndetësore, udhëtime apo investime të supozuara.

Mashtrimi i aksidentit të rremë

“Mama (ose baba), kam bërë një aksident. Më duhen 2,000 euro për të paguar garancinë dhe për të mos pasur probleme.”

Ky është mesazhi që mashtruesit zakonisht u dërgojnë prindërve, të cilët i kanë identifikuar paraprakisht si objektiv. Të alarmuar dhe të frikësuar për fëmijën e tyre, prindërit shpesh reagojnë menjëherë dhe kryejnë një transfertë bankare në llogarinë e dhënë në mesazh. Në fund, mashtrimi realizohet dhe prindërit mbeten të shqetësuar dhe me xhepat bosh.

Telefoni i humbur

“Përshëndetje mami (ose babi). Jam (emri), kam humbur telefonin / më është prishur. Po të shkruaj nga ky numër tjetër, por nuk kam më kredit dhe nuk mund të dërgoj mesazhe të tjera. Më dërgo një WhatsApp në këtë link.”

Edhe në këtë rast, mashtruesit luajnë me emocionet e prindërve ose gjyshërve, të cilët, të shqetësuar për fëmijën, veprojnë pa hezitim. Ata nisin një bisedë me “fëmijën” e supozuar, e cila duket krejt normale, derisa ky i fundit kërkon një transfertë bankare për të përballuar një shpenzim të papritur. Pasi marrin paratë, mashtruesit zhduken.

Pakoja e bllokuar

Ky mashtrim shfrytëzon pritjen e një pakoje postare për të vjedhur të dhëna dhe para nga viktimat. Përdoruesi, i cili shpesh është vërtet në pritje të një dërgese, merr një mesazh me një link.

“Programo dorëzimin tani”, thuhet në tekst. Duke klikuar mbi linkun, viktima ftohet të fusë të dhëna personale dhe bankare. Në këtë mënyrë, kriminelët sigurojnë të gjitha informacionet e nevojshme për të krijuar identitete të rreme dhe për të kryer veprime të tjera të paligjshme.