Aktorja australiane Margot Robbie ka tërhequr vëmendjen në Paris Fashion Week pasi u shfaq me një model të ri flokësh gjatë prezantimit të koleksionit vjeshtë/dimër 2026 të shtëpisë së modës Chanel në të cilën ajo është ambasadore e brandit.

35-vjeçarja debutoi një prerje “lob” (long bob) të shoqëruar me baluke të lehta, një ndryshim i dukshëm nga flokët e saj të gjatë biondë që kishte mbajtur në paraqitjet e fundit publike. Robbie ishte ulur në rreshtin e parë së bashku me këngëtaren australiane Kylie Minogue dhe artisten britanike Olivia Dean.

Shfaqja u mbajt në ambientet e Grand Palais, ku skenografia me struktura të mëdha vinçash të ndriçuara me ngjyra primare krijoi një atmosferë që i ngjante një kantieri ndërtimi. Drejtori kreativ i Chanel, Matthieu Blazy, tha se ideja simbolizonte “ndërtimin e një ëndrre”, ndërsa vazhdon të riformësojë shtëpinë e modës të themeluar nga Coco Chanel në vitin 1910.

Modeli i ri i flokëve të Robbie u realizua nga stilisti Cervando Maldonado, i cili tha për Vogue se prerja “bob” me baluke është një stil modern për pranverën dhe verën, pasi ofron fleksibilitet dhe mundësi të ndryshme stilimi.

Prerja “lob” është bërë gjithnjë e më popullore në mesin e personazheve të njohur, me aktore si Penélope Cruz, Sienna Miller dhe Victoria Beckham që janë shfaqur së fundmi me stile të ngjashme.

Paraqitja e Robbie në Paris Fashion Week është ndër momentet më të komentuara të eventit, duke konfirmuar edhe një herë ndikimin e saj në trendet e modës dhe bukurisë.

Galeria fotografike