Episodi i katërt i serialit Love Story, nga Ryan Murphy, rikthen në vëmendje një nga fushatat më ikonike të viteve ’90: “Obsession for Men”. Skena hapëse ku dy adoleshente vjedhin një poster me foton topless të Kate Moss ndërsa pranë kalon John F. Kennedy Jr. simbolizon ndikimin kulturor që pati kjo fushatë në atë kohë.
Në serial, shfaqet momenti kur Carolyn Bessette përzgjedh foton e Kate Moss nga një grumbull aplikimesh në zyrat e Calvin Klein, duke bindur stilistin të investojë tek modelja e re. Edhe pse në realitet ajo nuk e “zbuloi” Moss në kuptimin e plotë të fjalës, Bessette luajti rol kyç në mbështetjen e saj për fushatën e diskutueshme të vitit 1992 për të brendshmet, ku Moss u shfaq përkrah Mark Wahlberg (atëherë i njohur si Marky Mark).
Sipas librit Champagne Supernovas nga Maureen Callahan, ishte pikërisht Bessette dhe drejtori artistik Fabien Baron që bindën Klein se Moss ishte fytyra që i duhej markës në një moment kritik financiar. Suksesi i linjës së të brendshmeve dhe parfumeve ndihmoi në rimëkëmbjen e kompanisë.
Në qendër të fushatës së vitit 1993 ishte edhe romanca mes Kate Moss dhe fotografit Mario Sorrenti. Vetë Calvin Klein ka treguar për revistën Interview se pasi pa fotot e realizuara nga Sorrenti, mendoi menjëherë për konceptin “Obsession”, pasi fotografi ishte “i fiksuar” pas Moss dhe ndjenja ishte reciproke.
Në vitin 2017, Moss deklaroi për Elle se lidhja e tyre ishte dashuria e saj e parë dhe një marrëdhënie e mbushur me pasion. Çifti u dërgua në Ishujt e Virgjër Britanikë për të realizuar fotot e fushatës, ku sipas Moss në një intervistë për Harper’s Bazaar puna ishte intensive dhe pa pushim: “Zgjohesha me klikimin e aparatit Pentax,” kujton ajo.
Fushata, me imazhe të zhveshura dhe minimaliste të Moss, ndihmoi në formësimin e estetikës “heroin chic” që do të dominonte modën e viteve ’90. Megjithatë, ajo nuk kaloi pa polemika: figura shumë e hollë e modeles u kritikua gjerësisht dhe disa revista refuzuan ta publikonin reklamën.
Pavarësisht kritikave, “Obsession for Men” u kthye në fenomen kulturor. Posterët mbushën autobusët dhe billbordet, ndërsa fansat i merrnin si suvenire. Në një intervistë për Vogue, Sorrenti kujtonte se në festa shihte reklamat e ngjitura në muret e shtëpive.