Kim Kardashian dhe Lewis Hamilton janë parë së bashku gjatë festivalit Coachella, duke shtuar edhe më shumë dyshimet për një lidhje mes tyre.

Dyshja u shfaqën të shtunën në mbrëmje gjatë performancës së Justin Bieber, teksa lëviznin nëpër turmë të shoqëruar nga rojet e sigurisë. Për të shmangur vëmendjen, ata kishin zgjedhur të mbulonin fytyrat me maska dhe aksesorë, por kjo nuk i ndaloi të tërhiqnin interesin e të pranishmëve.

Sipas dëshmitarëve, Kardashian dhe Hamilton kaluan pjesën më të madhe të kohës pranë njëri-tjetrit, madje në disa momente janë parë edhe duke mbajtur duart, ndërsa përshkonin turmën e festivalit. Kim kishte mbështjellë kokën me një shall për të fshehur identitetin, ndërsa Hamilton mbante kapelë, syze dielli dhe një shall mbi fytyrë.

Kjo nuk është hera e parë që ata shfaqen bashkë. Që prej paraqitjes së tyre në Super Bowl, dyshja janë parë shpesh në shoqërinë e njëri-tjetrit. Së fundmi, ata u fotografuan edhe në Tokio, ku sipas burimeve, po qëndronin së bashku. Me Kardashian ndodheshin edhe fëmijët e saj, Saint, Chicago dhe Psalm, nga martesa me Kanye West.

Edhe pse asnjëri prej tyre nuk ka konfirmuar zyrtarisht një lidhje, paraqitjet e shpeshta së bashku dhe afrimiteti i dukshëm kanë ngritur pikëpyetje të shumta mbi natyrën e marrëdhënies së tyre.