Supermodelja e njohur daneze Helena Christensen ka tërhequr vëmendjen në edicionin e fundit të Festivalit të Filmit në Cannes, duke u shfaqur me një fustan transparent që bie ndesh me rregullat e reja të eventit.

Festivali i Filmit në Kanë ka ndaluar këtë vit veshjet shumë të tejdukshme dhe “transparente” në tapetin e kuq, por Christensen duket se i ka anashkaluar këto kufizime me një zgjedhje mode mjaft provokuese.

Në premierën e filmit Amarga Navidad, 57 vjeçarja u shfaq me një fustan të zi të ndërtuar pothuajse tërësisht nga dantella transparente. Veshja përfshinte kupa të zeza prej kadifeje me detaje dantelle, një dizajn pa shpinë të mbajtur me rripa të hollë dhe pjesë të tejdukshme që ekspozonin barkun dhe këmbët.

Silhueta e fustanit kishte stil “sirene”, me fund të gjatë prej materiali të tejdukshëm dhe detaje prej mëndafshi të zi në pjesën e poshtme. Christensen e kompletoi pamjen me sandale të zeza me rripa të hollë.

Ajo e shoqëroi look-un me vathë rrethorë argjendi, një çantë të vogël prej lëkure të zezë dhe një orë të bardhë. Flokët e saj ngjyrë gështenjë i kishte stiluar në valë të buta me balluke që i binin mbi një sy, ndërsa make-up-i përfshinte tone të buta rozë dhe hije sysh në nuanca kafe.

Pamja e saj është komentuar gjerësisht në rrjet, duke u parë si një deklaratë mode që sfidon rregullat e reja të festivalit.