Tom Holland dhe Zendaya vazhdojnë të dëshmojnë se janë një nga çiftet më të dashura të Hollywood-it. Gjatë premierës së filmit epik The Odyssey, aktori britanik emocionoi me fjalët për bashkëshorten e tij, duke pranuar se puna krah saj e ka bërë më të sigurt dhe më të guximshëm si aktor, ndërsa Zendaya e cilësoi përvojën e përbashkët në ekran si një ëndërr të realizuar.

Tom Holland nuk i kurseu fjalët e admirimit për Zendayan gjatë premierës botërore të The Odyssey, filmi i ri i Christopher Nolan, ku të dy ndajnë ekranin në role kyçe.

Aktori zbuloi se bashkëpunimi me bashkëshorten e tij ka ndikuar drejtpërdrejt në mënyrën se si ai i qaset aktrimit.

“Kam mësuar të jem më i sigurt në vete dhe më guximtar. Ajo bën zgjedhje të mëdha kur interpreton personazhe,” u shpreh Holland.

Sipas tij, Zendaya ka një aftësi të rrallë për t’i ndërtuar personazhet me autenticitet, duke mos pasur frikë të eksperimentojë dhe t’i japë secilit rol një identitet të veçantë.

Në një intervistë për Entertainment Tonight, ai shtoi se guximi artistik i Zendayas është një nga arsyet pse e admiron kaq shumë.

Nga ana tjetër, edhe Zendaya ndau emocionet e saj për projektin, duke kujtuar momentin kur Tom mori telefonatën që i konfirmonte rolin në filmin e Christopher Nolan.

“Isha jashtëzakonisht e lumtur, shumë e emocionuar dhe tepër krenare për të,” tha aktorja, duke shtuar se lajmi se edhe ajo do t’i bashkohej kastit e bëri eksperiencën edhe më të veçantë.

“Ishte një ëndërr të punoja me të në këtë projekt. Të ndaja një përvojë të tillë me Tomin ishte diçka shumë e veçantë,” u shpreh Zendaya.

Deklaratat e tyre kanë prekur fansat në mbarë botën, të cilët i kanë cilësuar si një tjetër dëshmi të dashurisë, mbështetjes dhe respektit që çifti ndan si në jetën personale, ashtu edhe në karrierën artistike.