Princ Leka ka reaguar zyrtarisht pasi ditën e sotme ai dhe bashkëshortja e tij, Princesha Blerta, u bënë prindër të një djali, të cilin kanë vendosur ta quajnë Aleksandër. Tashmë Geraldina e vogël është bërë me një vëlla, ndërsa Oborri Mbretëror ka një trashëgimtar të ri.

Princ Leka ka bërë publike edhe disa detaje nga lindja e të birit, i cili erdhi në jetë sot, në orën 11:11, në Maternitetin “Mbretëresha Geraldinë”, institucion që mban emrin e gjyshes së tij.

Princi thekson se si i porsalinduri, Aleksandër, ashtu edhe bashkëshortja e tij, Princesha Blerta, gëzojnë shëndet të plotë. Gjithashtu, ai ka ndarë një fotografi familjare me të birin dhe Blertën nga materniteti.

Po ashtu, Princ Leka ka falënderuar stafin e Maternitetit “Mbretëresha Geraldinë” për kujdesin e jashtëzakonshëm, profesionalizmin dhe përkushtimin e treguar gjatë kësaj ngjarjeje të gëzueshme.