Pas disa vitesh larg Mbretërisë së Bashkuar, Princi Harry dhe Meghan Markle raportohet se po shqyrtojnë një rikthim më të gjatë në vend, këtë herë së bashku me fëmijët e tyre, Archie dhe Lilibet.

Sipas raportimeve, familja pritet të kalojë një periudhë të zgjatur në Britani, ndërsa dy fëmijët mund të regjistrohen në një shkollë atje duke nisur nga shtatori. Vendimi do të shënonte një ndryshim të rëndësishëm për familjen, e cila prej vitesh ka ndërtuar jetën e saj në Kaliforni.

Harry dhe Meghan nuk pritet të vendosen në ndonjë prej rezidencave mbretërore. Ata do të jetojnë në një banesë private, ndërsa do të ruajnë edhe shtëpinë e tyre në Montecito dhe pronën që kanë në Portugali.

Ky zhvillim vjen pas vizitës së fundit të familjes në Britani, ku Archie dhe Lilibet patën mundësinë të takonin Mbretin Charles III, në një takim të rrallë familjar pas më shumë se katër vitesh.

Megjithatë, rikthimi fizik në Britani nuk nënkupton edhe rikthimin e çiftit në jetën zyrtare të familjes mbretërore. Harry dhe Meghan pritet të vazhdojnë angazhimet e tyre të pavarura, jashtë detyrave mbretërore.