Alessio Aliaj dhe Jonida Maliqi tërhoqën jo pak vëmendje këtë verë, pasi u shfaqën së bashku në dasmën e Kidës në Romë. Fotot e tyre krah njëri-tjetrit nuk kaluan pa u vënë re dhe menjëherë ngritën pikëpyetje për raportin mes tyre.

I ftuar në emisionin “Në shtëpinë tonë”, modeli ka folur për herë të parë për këtë pjesë të jetës së tij, duke zgjedhur të mos japë një përgjigje të drejtpërdrejtë për natyrën e marrëdhënies me Jonidën, por as të mos i shuajë kureshtjet.

“Po ne kemi qenë në dasmë, se e kemi mikeshë Kidën. Jeta personale është mirë të rrijë e tillë, kam qejf t’i shijoj gjërat dhe po e shijoj. Gjërat rrjedhin vetë”, u shpreh Alessio.
Një përgjigje që, sigurisht, lë ende hapësirë për interpretim, sidomos pas imazheve të dyshes që kanë qarkulluar gjatë verës.

Përtej jetës personale, Alessio ndau edhe një anë më intime të tij. Ai u rikthye te fëmijëria në Tropojë, të cilën e kujton si një nga periudhat më të bukura të jetës, mes natyrës dhe orëve të gjata të kaluara jashtë.

“Ne kalonim orë të tëra jashtë, ndërsa sot fëmijët janë më të lidhur me teknologjinë, me iPad-et dhe telefonat”, tregoi ai.
Modeli foli gjithashtu me emocion për të atin dhe dhimbjen që i ka lënë humbja e tij, ndërsa një detaj i vogël, boronicat, e riktheu te kujtimet e fëmijërisë në Tropojë, ku tregoi se i mblidhte që kur ishte i vogël.