Çdo vit ndodh e njëjta gjë: temperaturat bien dhe edhe ato që mezi heqin dorë nga këpucët jopraktike me taka, detyrohen t’i zëvendësojnë me modele që i rezistojnë motit. Por këtë vit, pasarelat e modës kanë gjetur një mënyrë për t’i kënaqur të gjithë.

Koleksionet vjeshtë-dimër sollën dy qasje krejt të ndryshme. Nga njëra anë, Celine dhe Miu Miu zgjodhën prakticitetin dhe linjat e pastra, ndërsa Dior dhe Chanel sollën më shumë fantazi, me modele të veshura në mënyrë luksoze dhe të mbingarkuara me aksesorë. Edhe këpucët ndoqën të njëjtën filozofi dhe rezultati është një përzierje mjaft interesante.

Me pak fjalë, këpucët elegante prej sateni nuk janë më vetëm për raste të veçanta dhe mund të vishen edhe në dimër, çizmet e ecjes në natyrë po marrin një pamje shumë më elegante, ndërsa tendenca që po tërheq më shumë vëmendje duket se do t’i japë fund lodhjes nga këpucët balerinë: vendin e tyre po e zënë këpucët e frymëzuara nga stili i xhazit.

Nga modelet e sheshta te çizmet deri në kofshë, këto janë pesë tendencat e këpucëve që do të dominojnë sezonin vjeshtë-dimër 2026.

Sateni luksoz

Sateni mund të mos jetë materiali më praktik për dimër, por nëse nuk e ke kuptuar ende, luksi i përmbajtur nuk është më në qendër të vëmendjes. Dhe këpucët nuk bëjnë përjashtim.

Këpucët elegante me shkëlqim nuk kanë pse të ruhen vetëm për evente apo mbrëmje të veçanta. Dior sugjeron një mënyrë shumë më të bukur për t’i veshur: kombinoji me një palë xhinse të gjera dhe krijo një kontrast mes elegancës dhe stilit të përditshëm.

Prakticiteti në versionin elegant

Tani kalojmë te prakticiteti. Edhe pse një palë këpucë të përshtatshme për motin janë gjithmonë të mirëpritura, kjo nuk do të thotë se duhet t’i kthehemi plotësisht stilit sportiv të veshjeve për natyrë.

Miu Miu, për shembull, i kombinon çizmet e ecjes me fustane të shkurtër që lënë këmbët të zbuluara. Është një tjetër shembull i parimit se këpucët nuk kanë pse të përputhen domosdoshmërisht me pjesën tjetër të veshjes. Pra, edhe kur zgjedh diçka praktike për motin, nuk ke pse të heqësh dorë nga stili.

Çizmet deri në kofshë

Kjo tendencë në pasarelat e sezonit na ktheu menjëherë te periudha kur çizmet deri në kofshë ishin ndër modelet më të preferuara, rreth vitit 2016, kur ishin pjesë e pandashme e stilit të Ariana Grande-s.

Modelet e prezantuara nga Chloé dhe Valentino tregojnë se sa elegante mund të duken çizmet mbi gju, sidomos kur kanë një formë paksa të lirshme dhe të mbledhur. Ato janë një zgjedhje që bashkon prakticitetin me sensualitetin: mbulojnë pjesën më të madhe të këmbës, por pa humbur aspak karakterin joshës.

Frymëzim amerikan

Çizmet kauboj duket se janë të destinuara të rikthehen vazhdimisht në modë. Edhe këtë sezon, pasarelat sollën elemente të stilit amerikan të Perëndimit, por çizmet e këtij lloji u shfaqën në kombinime që nuk do t’i prisje domosdoshmërisht.

Rabanne dhe Gabriela Hearst ishin mes stilistëve që i përfshinë çizmet kauboj në koleksionet e tyre, pa e çuar veshjen deri në pamjen tipike të një vajze të veshur për kalërim. Këtë vjeshtë, ideja është t’i përdorësh si një detaj që i jep karakter një veshjeje, jo domosdoshmërisht si pjesë të një stili tërësisht perëndimor.

Gjithçka për xhazin

Mendoji këpucët e frymëzuara nga stili i xhazit si një përzierje mes këpucëve balerina, këpucëve klasike me lidhëse dhe atleteve të thjeshta. Pas një periudhe kur këpucët balerina dominuan stilin e pranverës dhe verës, ky version retro dhe pak më klasik po fiton gjithnjë e më shumë popullaritet.

Celine ka ndihmuar në rritjen e interesit për këtë model, aq sa tendenca është shfaqur edhe në koleksionin e saj të veshjeve për meshkuj për pranverën e ardhshme. Me lidhëset, formën e ulët dhe pamjen e pakujdesshme, këto këpucë janë një alternativë më e freskët për këdo që është lodhur nga balerinat tradicionale.