Aktori i njohur Agron Llakaj ka prekur zemrat e ndjekësve të tij në Instagram me një letër të ndjerë kushtuar bashkëshortes së tij, Kostandinës, e cila sot, më 1 dhjetor, do të festonte ditëlindjen. Në postimin e tij, Llakaj ndan mallin dhe dhimbjen për humbjen e saj, duke kujtuar ditëlindjen e fundit që festuan së bashku. “Si sot një vit më parë, festuam me gëzim, kënduam me zjarr ‘happy birthday’ pa e ditur se kjo ishte torta e fundit me Ty. Sot, kjo ditëlindje vjen e pakuptimtë pa praninë tënde,” shkruan ai. Aktori përshkruan përditshmërinë e tij të përshkuar nga kujtimet, duke treguar se një tufë lule dhe një qiri simbolizojnë dashurinë dhe respektin që ruan për të. “Shpirti yt vjen si flutur ose vegim. Ne kërkojmë një shenjë nga Ty, duke shpresuar që ai ylli që ndriçon më fort natën je Ti,” shpreh ai me dhimbje. Llakaj përfundon letrën me një mesazh dashurie dhe mirënjohjeje: “Ti je këtu, mes nesh, mes atyre që të deshën aq shumë. Për Ty do ketë veç Ditëlindje! Të Dua!”