Një burrë 62-vjeçar me sëmundje renale në fazën përfundimtare është bërë njeriu i parë që ka marrë një veshkë të re nga një derr i modifikuar gjenetikisht, njoftuan mjekët nga Spitali i Përgjithshëm Massachusetts në Boston. Kirurgjia katër-orëshe, e kryer më 16 mars, shënon një moment historik në përpjekjen për të ofruar organe më të disponueshme për pacientët, tha spitali në një deklaratë. Pacienti, Richard Slayman nga Weymouth, Massachusetts po e merr vete shumë mirë dhe pritet të dalë shpejt nga spitali. Ekspertët janë shumë të interesuar për rezultatet afatgjata të transplantit novator nga kafsha te njeriu, tha Jim Kim, drejtor i transplantit të veshkave dhe pankreasit në Institutin e Transplantit USC në Los Anxhelos. Slayman kishte marrë një transplant të një veshke nga njeriu në të njëjtin spital në vitin 2018 pas shtatë vitesh në dializë, por organi dështoi pas pesë vjetësh dhe ai kishte rifilluar trajtimet e dializës. Veshka u sigurua nga eGenesis i Kembrixhit, Massachusetts, nga një derr që ishte modifikuar gjenetikisht për të hequr gjenet e dëmshme për një marrës njerëzor dhe për të shtuar gjene të caktuara njerëzore për të përmirësuar përputhshmërinë.

Kompania gjithashtu çaktivizoi viruset e qenësishme të derrave që kanë potencialin të infektojnë njerëzit. Veshkat nga derrat e modifikuar në mënyrë të ngjashme të rritur nga eGenesis ishin transplantuar me sukses te majmunët që u mbajtën gjallë për një mesatare prej 176 ditësh dhe në një rast për më shumë se dy vjet, raportuan studiuesit.