Hysni Qestaj, DJ humbi jetën të dielën e Pashkëve në një aksident rrugor, teksa po udhëtonte me Ferrari së bashku me një vajzë. Të dy humbën jetën në aksident, pasi u përplasën në mënyrë fatale në rrugën Torino-Aosta, Itali. Ende nuk dihet identiteti i vajzës që udhëtonte me 40-vjeçarin, ndërsa bashkëshortja e tij ndodhet në Kosovë, së bashku me fëmijët e tyre përkatësisht 11 dhe 14 vjeç. Lidhur me ngjarjen ka folur edhe vëllai i viktimës, Agim Qestaj.

“Është e vështirë që ta përshkruaj këtë njeri të madh dhe pozitiv me fjalë, por nëse do të zgjidhja një fjalë do të thoja që ai ishte personi më i dashur që kam njohur”, shprehet ai.

Ishte ai që konfirmoi se vëllai tjetër, me banim në Itali ishte thirrur dje nga policia rrugore për të identifikuar trupin. Ndërkohë prokuroria ka kërkuar analizën e ADN-së për eshtrat e dy viktimave. Ndërkohë për ndarjen nga jeta të 40-vjeçarit ka reaguar edhe Komuna e Junikut, ku u rrit Qestaj.

“Mëngjesi i ditës së sotme ishte i rëndë për Junikun. Në një aksident të rëndë trafiku, bashkëvendasi ynë Hysni Qestaj ka ndërruar jetë. Kryetari i komunës z.Ruzhdi Shehu dhe të gjithë qytetarët e Junikut ndajnë dhimbjen me familjen e të ndjerit. I ndjeri të kujtohet gjithmonë me respekt dhe dashuri”, shkruhej në rrjetet sociale.