Elia Zaharia është divorcuar zyrtarisht nga Princ Leka. Gjykata e Tiranës, më 25 prill ka vendosur të zgjidhë martesën mes Leka Zogut dhe aktores së njohur. Sipas vendimit të Gjykatës, tradhtia nuk ka qenë arsye e fundit të martesës së çiftit të njohur, siç është aluduar pas bërjes publike të romancës së Princ Lekës me fotografen Blerta Celibashi, me të cilën ka nisur edhe bashkëjetesën. Elia Zaharia dhe Princ Leka janë ndarë për shkak të konflikteve të vazhdueshme, mungesës së komunikimit, fakte të pranuara nga aktorja si edhe 42-vjeçari.
Në vendimin e gjykatës thuhet se të dy prindërit kanë shprehur dëshirën për të kontribuar në jetën e vajzës, ndërsa kujdestaria i është lënë Elias, por princi sipas marrëveshjes do të paguajë 1 mijë euro vlerë monetare mujore si detyrim ushqimor. Kjo shumë përfshin shpenzimet për nevojat e përditshme të fëmijës dhe do të paguhet në llogarinë bankare të Elias, por babai do të ketë informacion të plotë për mënyrën sesi përdoren pagesat.
Sipas marrëveshjes, Elja do të jetojë në një apartament 257 m2 në qendër të Tiranës, pas ish-hotel Dajtit, që Leka ia ka dhënë vajzës, Geraldinës por mund të përdoret nga aktorja për aq kohë sa ajo nuk ka një partner. Po ashtu Elia do të ketë në pronësi të plotë një dyqan 134 m2 në katin -1 të këtij pallati si dhe një parking rreth 47 m2. Gjithashtu në këtë vendim është përcaktuar se aktorja nuk do e mbajë më mbiemrin Zogu, por do të rikthejë atë të vajzërisë, Zaharia. Skandali mbretëror doli në sipërfaqe në fillim të marsit, ku edhe në media u shfaqën pamje nga përplasja fizike të Princ Lekës dhe Elia Zaharias.
Por teksa situata me Elian dhe familjarët e saj është e nderë, Princi ka gjetur një tjetër dashuri dhe gjërat mes tyre tashmë janë serioze. Prej disa javësh, ai dhe fotografia disa vite më e re kanë nisur edhe bashkëjetesën në shtëpinë ku aktualisht Leka po jeton. Duke qenë se Elia me vajzën e çiftit si dhe me familjarët e saj po qëndron në pronën e tij, Princi ka nisur një jetë të re me Blertën në një shtëpi me qira.