Mediat shtetërore të Iranit kanë konfirmuar lajmin e vdekjes së presidentit të vendit Ebrahim Raisi dhe Ministrit të i Jashtëm Hossein Amir-Abdollahian, të cilët ishin në helikopterin që u rrëzua një ditë më parë.

Helikopteri me të cilin po udhëtonte presidenti iranian Ebrahim Raisi dhe Ministri i Jashtëm u rrëzua të dielën ndërsa po fluturonte në një mjegull të dendur mbi një territor malor. Rrëzimi i mundshëm i helikopterit vjen një muaj pasi Irani, nën drejtimin e Presidentit Raisi dhe udhëheqësit suprem Ayatollah Ali Khamenei, ndërmori një sulm të paprecedentë me dronë dhe raketa kundër Izraelit dhe ka shtuar pasurimin e uraniumit pranë nivelit të një arme bërthamore.Ende nuk dihen rrethanat e plota të aksidentit tragjik ku humbi jetën presidenti iranian, por mediat shtetërore bëjnë me dije se helikopteri që transportonte Ebrahim Raisin ishte një Bell 212.

Është e paqartë se sa i vjetër ishte helikopteri, por ky model u zhvillua për ushtrinë kanadeze në vitet 1960. Helikopterët janë prodhuar nga kompania amerikane Bell Helicopter dhe janë përdorur gjerësisht nga operatorët qeveritarë, duke përfshirë agjencitë amerikane të zbatimit të ligjit dhe policinë kombëtare të Tajlandës. Forcat detare dhe ajrore të Iranit kanë gjithsej 10, sipas drejtorisë së Forcave Ajrore Botërore të FlightGlobal 2024, por është e paqartë se sa operon qeveria iraniane. Këta helikopterë mund të përdoren për transportin e njerëzve dhe ngarkesave, si dhe mund të pajisen me armë për luftim. Agjencia shtetërore e lajmeve IRNA thotë se helikopteri ku ndodhej presidenti mund të transportonte gjashtë pasagjerë dhe dy anëtarë të ekuipazhit.