Shkrimtarja e njohur, Helena Kadare “Në Kurthin e Piter Pan” tregoi për karrierën, jetën e saj dhe sigurisht për njohjen me shkrimtarin Ismail Kadare.

Helena Kadare: Ai mori çmimin e Republikës, unë isha nxënëse në gjimnaz dhe të gjithë e dinin që i dija përmendsh të gjitha poezitë e tij dhe më kishin shtruar fotot e tij të gazetës. Ai nuk më njihte fare. Unë botova një tregim tek Zëri i Rinisë. Ai ishte në Moskë, kishte përfunduar studimet këtu dhe kishte vajtur për specializim. Atje vinin gazetat shqiptare në një hotel në Moskë. Ai pa këtë tregim dhe më bëri 3 rreshta: Lexova tregimin tuaj, shkruani dhe mos u trembni. I gjithë gjimnazi e mori vesh këtë gjë që erdhi kjo letër. Pastaj kur erdhi në Shqipëri, u njohëm rastësisht në rrugë.

A kishte në ato kohë një propozim dashurie?

Helena Kadare: Në atë kohë nuk kishte një propozim martese.

Direkt e tek martesa?

Helena Kadare: Unë isha në konvikt, isha studente e vitit të parë dhe ishte Lidhja e Shkrimtarëve. Ismaili ftoi të gjithë shkrimtarët dhe unë ftova të gjitha shoqet e konviktit duke zemëruar jashtëzakonisht shumë farefisin tonë dhe gjithashtu edhe gratë e shkrimtarëve që nuk ishin të ftuara. Aty u njohën dhe Sadija me Dritëro Agollin, ishte shoqe e klasës time.