Charles Spencer, vëllai më i vogël i princeshës së ndjerë Diana dhe gruaja e tij Karen Spencer, kanë nisur procedurat e divorcit pas 13 vitesh martesë. Ai ka punësuar të njëjtin avokat që mbreti Charles përdori gjatë ndarjes së tij me Princeshën Diana.

Lajmi për divorcin u konfirmua nga vetë ai i cili në një intervistë të fundit tha: “Është jashtëzakonisht e trishtueshme. Unë thjesht dua t’i përkushtohem fëmijëve të mi dhe nipërve të mi dhe i uroj Karenit lumturi në të ardhmen”.

Spencer dhe Karen u martuan në qershor 2011 dhe së bashku kanë një vajzë 12-vjeçare të quajtur Charlotte Diana, duke nderuar princeshën e ndjerë të Uellsit. Karen ka dy vajza nga një martesë e mëparshme, ndërsa Charles ka gjashtë fëmijë nga dy martesat e tij të para. Në mars, Charles botoi kujtimet e tij, A Very Private School , ku foli për jetën e vështirë gjatë kohës së tij në konvikt si djalë i ri. Kur u publikua libri, ai falënderoi Karen për mbështetjen e saj gjatë kësaj kohe.

“Karen ka qenë mbështetëse. Ajo gjithmonë shpresonte që unë të isha i lumtur. Jam mirënjohës që ajo më qëndronte pranë”, tregonte ai.