Kënga Magjike ka nisur të krijojë emocionet e para, teksa në emisionin “E diela shqiptare” në Tv Klan janë prezantuar artistët që do të konkurrojnë për natën finale. Por krahas këngëtarëve dhe këngëve që dëgjojmë javë pas jave, një nga pyetjet që ngacmon më shumë publikun është se cilët do të jenë prezantuesit e këtij edicioni. Kompozitori dhe moderatori Ardit Gjebrea e zbuloi surprizën gjatë transmetimit të së dielës. Dy bashkëprezantueset që do ta shoqërojnë këtë vit në skenën e Kënga Magjike janë spikerja Matilda Mcini dhe blogerja Selin Bollati. Një moment i veçantë ishte forma se si Gjebrea e ndau këtë lajm me publikun dhe me familjarët e Matildës, duke përdorur një videotelefonatë ku djali i saj shfaqej tepër i emocionuar për këtë projekt të ri të nënës së tij.

Kënga Magjike 2024 do të zhvillohet në Pallatin e Kongreseve në muajin dhjetor, megjithatë datat e sakta pritet të zbulohen së shpejti. Publiku mezi pret të shohë se si do të rrjedhë spektakli dhe të shijojë performancat e artistëve pjesëmarrës, por tashmë me emocionin e shtuar që do të sjellë prania e Matildës dhe Selinit krah Gjebresë në drejtimin e këtij eventi të madh muzikor.