Xhensila Myrtezaj ka folur për herë të parë për divorcin e saj nga Bes Kallaku dhe njëkohësisht divorcin e prindërve të saj, kur ajo ishte 6 vjeçe sa është sot vajza e saj, Ajka. Xhensila tregon sekretin e dhimbshëm që ka ruajtur prej vitesh, çasti kur babai plagosi 7 herë me thikë të ëmën sepse ajo kërkoi të divorcohej nga ai. E gjithë ngjarja e rëndë ndodhi në sytë e Xhensilës.

“Për ironi të fatit unë kam qenë 6 vjeçe kur u ndanë prindërit e mi, sa Ajka sot. Unë e mbaj mend periudhën e divorcit të prindërve të mi. Është një periudhë e tmerrshme e jetës sime. Unë e dua shumë nënën time, por edhe e gjykoj që nuk pati mundësinë që t’i jepte fund asaj martese përpara se të ndodhte ajo që panë sytë e mi. Im at nuk e pranoi divorcin nga ime më. Mamaja ime ka qenë rasti i asaj gruas që u plagos me 7 thika dhe humbi njërën dorë. E gjitha kjo ndodhi para syve të mi. Kam parë nënën time teksa therej sepse kërkoi divorcin. Edhe unë e kam ruajtur shumë këtë sekret sepse nuk dua ta lëndoj babanë. Ai është penduar shumë për atë veprim, sepse nuk ka qenë në dijeni se çfarë po bënte ngaqë ishte nën efektin e alkoolit. Por nëna ime e ka falur. Ai është babai im dhe këtë gjë nuk e ndryshon asgjë në botë. Kur babai im qe në burg, ishte bërë divorci, nëna ime më mori dhe më çoi në burg të takoj babanë. Ajo ndiente keqardhje për babanë tim, edhe pse ai e masakroi. Por kështu jemi ne femrat, mbulojmë tjetrin, falim, për hir të fëmijëve, por edhe për të pastruar shpirtin.”, tregoi Xhensila në “Mirëmbrëma yje” nga Arbana Osmani.