Më 4 shkurt 2004, Mark Zuckerberg dhe katër shokët e tij të dhomës, ndërkohë studentë në Universitetin e Harvardit, lançuan “TheFacebook.com”, që më vonë u bë Facebook. Ky moment shënon 21 vjetorin e krijimit të një prej platformave më të fuqishme të komunikimit në botë.
Nga një projekt fillestar për studentët e Harvardit, Facebook u shndërrua në një motor masiv të lidhjesh shoqërore që ka transformuar mënyrën se si njerëzit lidhen, si bizneset gjenerojnë të ardhura, si politikanët fitojnë pushtet dhe si informacioni qarkullon nëpër komunitete dhe kultura të ndryshme.

Fillimisht i kufizuar për studentët e Harvardit, Facebook u zgjerua më pas për universitete të tjera dhe më vonë për çdo individ mbi 13 vjeç. Rritja e shpejtë e platformës solli një vlerësim prej 104 miliardë dollarësh në vitin 2012. Në vitin 2014, Sheryl Sandberg, shefe e veprimtarive në Facebook, shpjegoi se Zuckerberg gjithmonë kishte pasur një vizion më të madh se sa një kompani, duke synuar ndërlidhjen e njerëzve në mbarë botën.

Pavarësisht rritjes së vazhdueshme të numrit të përdoruesve dhe të ardhurave, Facebook është përfshirë në disa skandale të lidhura me privatësinë dhe shitjen e të dhënave personale të përdoruesve. Për këtë, Zuckerberg u detyrua të përballet me autoritetet amerikane.

Sot, Facebook mbetet një nga platformat më të fuqishme për komunikim, reklamim dhe përhapjen e informacionit në nivel global, duke ndryshuar përgjithmonë dinamikat e shoqërisë moderne.