Pas muajsh spekulimesh dhe polemikash, Chiara Ferragni ka vendosur të flasë publikisht për çështjet gjyqësore që e kanë përfshirë dhe për thashethemet mbi jetën e saj personale. Në një intervistë për gazetarin Michel Dessì nga Pomeriggio Cinque, sipërmarrësja italiane u shpreh e vendosur për të mbrojtur pozicionin e saj, duke ritheksuar pafajësinë dhe dëshirën për t’i dhënë fund akuzave kundër saj.
“Ky vit ka qenë shkatërrues në shumë aspekte, por tashmë jemi mësuar me këto ulje-ngritje të plota,” u shpreh Ferragni. Ajo pranoi se vendimi për ta çuar çështjen e saj në gjykatë ishte një goditje e papritur: “Nuk e prisja, por është në rregull. Unë jam e sigurt që jam 100% e pafajshme dhe këtë do ta provoj. Nuk kam asnjë dyshim për këtë.”

Kjo situatë ka pasur edhe pasoja financiare për të. Ferragni kujtoi se tashmë ka paguar 3.4 milionë euro në gjoba dhe donacione për bamirësi në lidhje me këtë çështje. “Për këtë situatë kam dhënë tashmë një deklaratë dhe nuk kam shumë për të shtuar, as për këtë dhe as për çështje të tjera,” theksoi ajo.

Gjykimi është planifikuar të nisë më 23 shtator 2025, një datë që mund të sjellë një fund përfundimtar të kësaj historie.