Pas rrëmujës së krijuar nga takimi gjysmë i fshehtë i Keijsi Hysenit me kupidin e “Për’puthen”, Loredana Bratin, konkurrenti është rikthyer sërish në qendër të vëmendjes.

Takimi i tij me Loredanën solli jo pak pasoja: ajo u largua nga programi duke u justifikuar me arsye personale, ndonëse publiku e interpretoi si pasojë të thyerjes së rregullores. Ndërkohë, Keijsi u përball me një “gjyq” në studio, ku si opinionistët ashtu edhe moderatorja Megi Pojani i kërkuan shpjegime për veprimet e tij. Ai u mbrojt duke thënë se kishte darkuar me Loredanën vetëm për respekt, por ky justifikim nuk u prit me shumë besim.

Përplasja më e fortë ndodhi me Stelinën, vajzën me të cilën Keijsi ka nisur të njihet prej tre javësh. Pas debateve dhe ndërhyrjes së opinionistit Laert Vasili, dyshja u pajtua dhe duket se marrëdhënia e tyre po vijon.

Këtë herë, vetë Keijsi ka ndarë në InstaStory një foto me Stelinën. Ai duket se i ka mbajtur premtimin për ta marrë në një xhiro me motor, ndërsa gjesti i tij romantik nuk kaloi pa u vënë re: videoja shoqërohej me këngën ikonike “03 Bonnie & Clyde” nga Jay-Z dhe Beyoncé, ndërsa fytyrën e Stelinës e kishte mbuluar me një trëndafil virtual – megjithëse ishte e qartë se bëhej fjalë për të.

A janë Keijsi dhe Stelina çifti i radhës që po lind në “Përputhen” apo thjesht një afrim mes tyre? Kjo mbetet për t’u parë në vijim.