Në emisionin “Mirëmbrëma Yje” me Arbana Osmanin, gazetarja dhe autorja Mira Kazhani ndau një nga rrëfimet më të ndjera të jetës së saj, përballjen me kancerin e gjirit, një sfidë të cilën tashmë e ka përshkruar edhe në librin e saj “Një tjetër ditë”.

Por përtej betejës personale me sëmundjen, momenti që preku më shumë publikun ishte ai kur Kazhani foli për raportin me të atin, i cili vuan nga demenca.

“Jam përpjekur t’ia them babit që kam shkruar një libër, që kam folur shumë mirë për të. Ai më shikon në sy, ndoshta e kupton në atë moment, ndërsa mami e thyen, se nuk do që unë të qaj, dhe thotë: ‘Këtë ke lavdëruar më shumë se mua, më ke nxjerrë pak shtrigë’,” – rrëfeu ajo mes emocionesh.

Mira shtoi se dëshira e saj më e madhe do të ishte që babai ta kuptonte plotësisht këtë rrugëtim të vështirë që ajo ka kaluar një histori guximi dhe mbijetese por që fatmirësisht, sot mund ta tregojë si një kapitull të mbyllur me sukses.