Në familjet tona jemi mësuar që gjella me mish të jetë më së shumti pjata kryesore në tryezë. Ju mund të zgjidhni llojin e misht që ju pëlqen më shumë, por e rëndësishme është ta prisni mishin në copa të vogla, aq sa një kafshatë.

Për disa është thelbësore që copat e mishit të lyhen me miell para se të skuqen, por të tjerë nuk e preferojnë këtë. Një mënyrë e mirë për t’u siguruar që mishi të mos ngurtësohet, është ta lyeni me shumë pak miell. Mbani mend se për të përgatitur një gjellë me mish, fillimisht duhet t’i gatuani përbërësit veçmas dhe më pas t’i kombinoni.

Një kaurdisje e thjeshtë e mishit me vaj ulliri dhe qepë është minimumi i padiskutueshëm që duhet të bëni. Më pas aty mund të shtoni edhe perimet që ju pëlqejnë më shumë si bizelet, kërpudhat, patatet ose bishtajat. Kur vjen momenti për t’i kombinuar perimet me mishin, mund të keni ende dyshime rreth sasisë së lëngut që duhet të shtoni. Shtoni ujë apo çfarëdo lloj lëngu që po përdorni, duke u siguruar që të mbulojnë mishin. Gatuajeni në zjarr të ulët dhe shtoni vazhdimisht nga pak lëng.

Në këtë mënyrë nuk do të rrezikoni të sillni në tryezë një ushqim të thatë ose të fortë. Nëse jeni me nxitim, shmangni vaktet që kërkojnë zierje. Koha e gatimit është e rëndësishme dhe nuk mund të jetë e shkurtër.

Për ta bërë mishin më të butë, ai duhet të ziejë për të paktën 2 orë, ndërsa për mishrat e bardhë që janë më të butë do të duhen rreth 40 minuta, por jo më pak.