Historia e dashurisë mes Kate Middleton dhe Princit William është parë për vite si simbol i një monarkie moderne dhe të qëndrueshme. Megjithatë, një libër i ri zbulon se marrëdhënia e tyre ka kaluar një krizë serioze dhe ishte shumë pranë fundit, më afër sesa publiku ka ditur ndonjëherë.
Sipas revistës People, libri “William and Catherine: The Monarchy’s New Era: The Inside Story” i autorit Russell Myers, që pritet të publikohet më 10 mars, bazohet në rreth 100 intervista dhe sjell detaje të panjohura nga prapaskenat e lidhjes së çiftit mbretëror.
Pas disa vitesh lidhjeje, që nisi në Universitetin St. Andrews, presioni i të qenit partnerja e trashëgimtarit të fronit britanik filloi të rëndonte mbi Kate-n. Më 9 janar 2007, në ditëlindjen e saj të 25-të, ajo u përball me dhjetëra fotografë dhe ekipe televizive jashtë apartamentit të saj në Londër. Nën blicet e pandërprera dhe ndjekjen agresive të paparacëve, ajo mezi arriti të hipte në makinë.
E tronditur, Kate telefonoi William-in në lot, duke i thënë se nuk mund ta përballonte më situatën. Presioni mediatik ishte bërë i padurueshëm, ndërsa William ndihej i pafuqishëm për ta mbrojtur. Në mars të vitit 2007, gjatë festivalit të garave me kuaj në Cheltenham, marrëdhënia e tyre dukej e ftohtë dhe e tensionuar. Sipas autorit, Kate kërkoi një angazhim të qartë për të ardhmen – jo domosdoshmërisht fejesë të menjëhershme, por siguri dhe seriozitet. Në një bisedë telefonike rreth 30-minutëshe, William pranoi se nuk mund të garantonte martesë. Kjo e lëndoi thellë Kate-n dhe çifti vendosi të ndahej përkohësisht.
Pas disa muajsh distance, William hodhi hapin e parë drejt ribashkimit. Fillimisht përmes mesazheve dhe më pas në një takim ku, sipas dëshmitarëve, u kuptua menjëherë se ndjenjat mes tyre nuk ishin shuar.Ata kaluan orë të tëra duke folur hapur për frikërat dhe pasiguritë e tyre. Kate ishte e gatshme të ndërtonte një të ardhme me të, por vetëm nëse ai nuk do të lejonte që presionet e jashtme të ndikonin në vendimet e tij.Ribashkimi i tyre çoi në martesën madhështore të vitit 2011 dhe në krijimin e familjes me tre fëmijë: Princin George, Princeshën Charlotte dhe Princin Louis. Libri thekson se sfidat nuk përfunduan me martesën. Çifti u përball me ndryshime të mëdha pas vdekjes së Mbretëreshës në vitin 2022, tensione brenda familjes mbretërore dhe, së fundmi, me diagnozën e kancerit të Kate-s në vitin 2024.
Sipas autorit, ajo që i ka mbajtur të bashkuar ka qenë komunikimi i hapur dhe mbështetja reciproke. Historia e tyre, që sot duket si një rrugëtim i sigurt drejt fronit, në të vërtetë ka kaluar një krizë që mund ta kishte ndryshuar përgjithmonë fatin e monarkisë britanike.