Nju Jorku është gati për natën më të madhe të modës, Met Gala, ku rreth 450 të ftuar të nivelit të lartë do të parakalojnë në tapetin e kuq në mbështetje të Costume Institute në Metropolitan Museum of Art.

Tema e këtij viti, “Costume Art”, lidhet me ekspozitën e re të muzeut që përfshin rreth 400 veshje dhe objekte që shtrihen në një periudhë prej 5,000 vitesh. Ndërkohë, kodi i veshjes “Fashion Is Art” fton të ftuarit të trajtojnë modën si një formë arti të mishëruar.

Pritet që yjet të frymëzohen nga rryma të mëdha artistike si baroku, impresionizmi apo rilindja, madje edhe nga piktura specifike, duke krijuar një spektakël të larmishëm në tapetin e kuq.

Eventi këtë vit drejtohet nga figura ikonike e modës Anna Wintour, e cila ka zgjedhur si bashkë-kryetarë emra të mëdhenj si: Në komitetin pritës përfshihen gjithashtu emra të njohur si Sabrina Carpenter, Doja Cat dhe Zoë Kravitz.

Ndër sponsorët dhe bashkë-kryetarët është edhe themeluesi i Amazon, Jeff Bezos, së bashku me bashkëshorten e tij Lauren Sanchez Bezos. Pjesëmarrja e tyre ka nxitur reagime dhe thirrje për bojkot, me aktivistë që kanë vendosur postera pranë muzeut duke ngritur shqetësime për të drejtat e punëtorëve.

Sipas traditës, Met Gala zhvillohet të hënën e parë të majit, me mbërritjet që nisin rreth orës 18:00 sipas kohës lokale.

Ndërsa në Shqipëri ky orar i bie rreth mesnatës, afërsisht 23:30–00:00 sipas orës lokale për të vijuar deri në orët e para të mëngjesit. Edhe pse publiku nuk ka akses në brendësi të eventit ku ofrohen darka, kokteje dhe performanca live tapeti i kuq mbetet një nga momentet më të ndjekura në botë.

Met Gala jo vetëm që mbledh fondet kryesore për Costume Institute, por gjithashtu shërben si pikë kulmore për industrinë e modës dhe kulturën pop. Nuk është rastësi që projekte të mëdha si The Devil Wears Prada 2 sinkronizojnë promovimin e tyre me këtë event.

Mes artit, modës dhe debatit social, edicioni i këtij viti pritet të jetë një nga më të diskutuarit ndonjëherë.