Këngëtarja amerikane Madonna ka publikuar një film të shkurtër me pjesëmarrjen e disa emrave të njohur të botës së muzikës, modës dhe kinemasë, mes tyre Sabrina Carpenter, Kate Moss, Benedict Cumberbatch dhe Richard E. Grant.

Projekti, i titulluar “Confessions II, The Film”, shërben si shoqërues vizual i albumit të ri “Confessions II”, i cili pritet të dalë muajin e ardhshëm. Filmi u shfaq fillimisht në Festivalin Tribeca në Nju Jork dhe tashmë është publikuar në YouTube.

Videoja 10-minutëshe përfshin gjithashtu Julia Garner, Gwendoline Christie, Honey Dijon, Odessa A’zion, Shygirl, Arca, si dhe vajzën e Madonnës, Lourdes Leon. Në disa skena shfaqen edhe futbollistët e “Chelsea-“s, Cole Palmer dhe Joao Pedro.

Filmi është ndërtuar mbi gjashtë këngë të albumit të ri, përfshirë “I Feel So Free”, “Good For The Soul”, “One Step Away”, “Bring Your Love”, “Danceteria” dhe “Read My Lips”.

Ngjarja nis me Madonnën në prapaskenë të një salle koncertesh, ku ndiqet nga robotë femra. Më pas ajo shfaqet në një pyll, vallëzon mes rrezeve lazer, performon në një sallë mbledhjesh dhe përfundon në një klub nate ku bashkohet me personazhet e famshëm që marrin pjesë në film.

Një nga momentet më të komentuara është transformimi i Madonnës në aktoren Julia Garner, e cila më parë ishte përzgjedhur për ta interpretuar këngëtaren në një film biografik që më vonë u anulua.

Filmi përmban gjithashtu disa skena provokuese dhe paraqitje të veçanta nga miq të hershëm të artistes, përfshirë aktoren Debi Mazar, e cila ka bashkëpunuar me Madonnën që në fillimet e karrierës së saj në vitet 1980.