Gisele Bündchen ka festuar 46-vjetorin e lindjes duke ndarë me ndjekësit disa momente të veçanta nga dita e saj. Supermodelja publikoi në Instagram një seri fotografish, ku tërhoqi vëmendjen me një palë bikini me motive leopardi.

Në një prej imazheve, Bündchen shfaqet këmbëzbathur, e shtrirë mbi një shezlong druri, ndërsa në dorë mban disa tullumbace në ngjyrë rozë dhe krem. Modelja, e cila mbushi 46 vjeç të hënën, falënderoi fansat për urimet dhe dashurinë e treguar.

“Faleminderit të gjithëve për dashurinë dhe urimet e ditëlindjes. Ndihem shumë mirënjohëse për këtë cikël të ri që po nis dhe për të gjitha aventurat që më presin. Uroj që dashuria dhe mirësia që ndani t’ju rikthehen njëmijëfish”, shkroi ajo.

Në albumin me fotografi, Gisele publikoi edhe një portret të saj me fytyrën të kthyer drejt diellit, si dhe tortën e ditëlindjes në formë zemre, të zbukuruar me arra dhe pa krem.

Në fotografinë e tortës u dallua edhe krahu i djalit të saj të vogël, të cilin modelja e ka me bashkëshortin Joaquim Valente. Emri i fëmijës, i lindur në shkurt të vitit 2025, nuk është bërë ende publik.

Urimet nuk munguan as nga emra të njohur. Heidi Klum i shkroi “Gëzuar ditëlindjen G”, ndërsa Victoria’s Secret, marka që e ktheu Bündchen në një prej modeleve më të famshme të viteve 2000, komentoi: “Gëzuar ditëlindjen, bukuroshe”.

Gisele Bündchen dhe Joaquim Valente, instruktor i jiu-jitsu, kurorëzuan dashurinë në një ceremoni intime të zhvilluar në shtëpi në nëntor të vitit 2025.

Supermodelja është gjithashtu nënë e Benjamin, 16 vjeç, dhe Vivian, 13 vjeçe, nga martesa me ish-bashkëshortin Tom Brady. Dyshja i dha fund martesës në tetor të vitit 2022, pas 13 vitesh së bashku.