Në një realitet politik të ngulfatur nga lodhja prej tranzicionit dhe mosbesimi ndaj sistemit, Taulanda Jupi nuk është një politikane e zakonshme. Ajo është një nga zërat më të qartë dhe më autentikë të së djathtës moderne në Shqipëri. Me një personalitet të fortë dhe një horizont politik të ndërtuar mbi ide, guxim dhe qytetari aktive, Jupi nuk ka reshtur asnjë ditë së foluri në emër të shumicës së heshtur, atyre qytetarëve që nuk ndihen të përfaqësuar nga politika tradicionale.

Si pedagoge dhe artiste, Taulanda ka zgjedhur të mos e shohë politikën si një karrierë, por si një akt shërbimi publik. “Si nënë, si qytetare dhe si profesioniste, unë nuk mund të qëndroja indiferente ndërsa Shqipëria përjeton braktisjen, varfërinë dhe humbjen e shpresës” u thotë ajo shpesh gazetarëve. Taulanda ka hyrë në politikë për të sjellë ndryshim sepse ajo nuk pret ta sjellin të tjerët.

Për Jupin, Tirana është më shumë sesa një zonë zgjedhore. Është qyteti ku ka lindur, është komuniteti që e ka formësuar, dhe është mikrokozmosi i Shqipërisë urbane që përballon pasojat e politikës klienteliste. Përballë një elite të korruptuar që mbron privilegjet e veta, Taulanda ka ngritur një opozitë qytetare të sinqertë, të artikuluar dhe pa kompromis me padrejtësinë. Ajo është një prej mbrojtëseve më të flakta të reformës në drejtësi, duke mbështetur me vendosmëri punën e SPAK dhe të institucioneve të reja që po luftojnë korrupsionin në nivelet më të larta.

Jupi nuk ngurron të përballet drejtpërdrejt me përfaqësuesit e pushtetit aktual, përfshirë edhe vetë kryeministrin. Qytetarët e ndjekin me vëmendje dhe simpati për fjalët e qarta, pa komplekse dhe pa zbukurime. Ajo flet me pasion për Shqipërinë që duhet të jetë: një vend ku të rinjtë, vajzat dhe djemtë, nuk janë makiazh për politikën e vjetër, por aktorë të vërtetë të së ardhmes që duan të ndërtojnë.

Për Taulandën, përfaqësimi politik i gruas nuk është një çështje kuotash, por drejtësi demokratike. “Gruaja shqiptare është 50% e popullsisë – pse duhet të mjaftohet me 30% të përfaqësimit?”, pyet ajo, me një qartësi që nuk lë vend për ekuivoke. E njëjta filozofi shtrihet edhe në besimin e saj te shpirti sipërmarrës i të rinjve, jo si përfitues ndihme, por si motor i lirisë ekonomike dhe zhvillimit të vërtetë.

Kjo është Taulanda Jupi, një politikane e djathtë moderne që flet me gjuhën e dashurisë, jo të urrejtjes. “Një grua e fortë” thotë ajo, “nuk lufton nga urrejtja për ata që ka përballë, por nga dashuria për njerëzit që përfaqëson” – u thotë ajo qytetarëve në takimet e përditshme. E vendosur, e përkushtuar dhe larg kompromisit me politikën e korruptuar, ajo është një zë i ri që po frymëzon qytetarët dhe po e kthen përfshirjen politike në një akt të ndershëm dhe frymëzues.