Këtë vjeshtë, moda bashkon dy botë të kundërta të fortën dhe të brishtën. Në shumë sfilata të Javës së Modës në New York City, modelet u shfaqën me kombinime provokuese ku lëkura e zezë u ndërthur me dantella delikate, shpesh edhe brenda të njëjtës veshje.

Një nga paraqitjet më të guximshme erdhi nga stilisti LaQuan Smith, i lindur dhe rritur në Queens. Ai prezantoi catsuit-in e tij karakteristik prej dantelle të zezë transparente, një model që e bëri të famshëm vite më parë dhe që është veshur nga yje si Beyoncé, Kylie Jenner dhe Megan Thee Stallion.

Në rreshtin e parë, të ftuarit VIP reflektuan po të njëjtin stil sensual. Modelja dhe aktorja Larsen Thompson veshi një catsuit me korse dantelle, ndërsa Azaryah Milan u shfaq me një pallto të shkurtër lëkure.

Koleksioni përfshinte gjithashtu një pallto të madh prej lëkure, fustane dantelle me korse dhe një fustan lëkure me dantellë transparente në pjesën e pasme një nga pjesët më provokuese të sfilatës.

Edhe stilisti Sergio Hudson prezantoi krijime që kërkojnë kujdes të veçantë. Fustanet dhe pantallonat e tij prej latex-i dhe dantelle të prerë me lazer janë aq delikate sa kërkojnë heqjen e bizhuterive dhe përdorimin e pudrës përpara veshjes. Koleksioni u realizua në bashkëpunim me studion kaliforniane Vex.

Ndërkohë, stilisti italian Nicola Brognano solli energji rock-and-roll për markën 7 For All Mankind, me xhinse të ulëta të kombinuara me xhaketa lëkure dhe fustane të shkurtra me pamje lëkure.

Një interpretim më poetik erdhi nga Joseph Altuzarra, i frymëzuar nga piktori Diego Velázquez dhe regjisorët Pedro Almodóvar dhe Luis Buñuel. Koleksioni i tij ndërthuri xhaketa lëkure me supe të stilit matador dhe funde dantelle Mantilla, duke sjellë një elegancë mesdhetare.

Ndërsa themeluesja e markës Alice + Olivia, Stacey Bendet, u frymëzua nga epoka e pasurisë së skajshme të shekullit XIX, duke modernizuar elemente viktoriane si dantella dhe qëndisjet.

E ftuara e saj, ylli i reality show-t Love Island UK, Jourdan Riane, u shfaq me një kombinim luksoz: xhaketë dantelle Chantilly, lëkurë të ekspozuar dhe një fund të gjatë prej lëkure.

Trend i qartë për sezonin e vjeshtës: kontrastet dominojnë. Lëkura simbolizon forcën dhe rebelimin, ndërsa dantella sjell sensualitet dhe finesë një balancë provokuese që pritet të pushtojë garderobat e sezonit.

Galeria fotografike