Një frymë e re po merr formë në botën e modës së dasmave: fustanet e verdha të nusërisë, nga nuancat e buta “butter” (gjalpi) deri tek tonet e gjalla prej “lemoni”. Pas viteve ku ngjyrat si rozë dhe nude dominonin alternativat ndaj të bardhës klasike, stilistët dhe nuset po përqafojnë gjithnjë e më shumë zgjedhje të guximshme si bluja, e kuqja dhe madje e zeza. Por tani e verdha duket se është protagonisti i ri i sezonit.

Ky trend po fiton terren edhe mes nuseve të njohura të revistës Vogue, duke konfirmuar se nuk bëhet fjalë për një modë kalimtare, por për një ndryshim të vërtetë në estetikën e dasmave moderne.

Një nga historitë që ilustron këtë prirje është ajo e Rachel, e cila kishte një dëshirë të qartë: një fustan me ngjyrë. E frymëzuar nga atmosfera e ndritshme e ishullit spanjoll Menorca, ajo kërkonte diçka jo tradicionale dhe plot jetë. Megjithatë, sfida më e madhe ishte gjetja e një fustani që të ishte njëkohësisht shumëngjyrësh dhe i përshtatshëm për një dasmë.

Pas shumë kërkimesh, Rachel u rikthye vazhdimisht tek një fustan i verdhë prej tyli nga Ralph Lauren, pjesë e koleksionit pranverë/verë 2015, që e gjeti në platformën Shrimpton Couture. Edhe pse nuk kishte mundësi kthimi, ajo vendosi ta blejë  një vendim që përfaqëson guximin e nuseve moderne për të ndjekur stilin e tyre personal.

Një tjetër shembull vjen nga Anna Virginia Visocchi Sanseverino di Marcellinara, e cila zgjodhi një fustan të verdhë për eventin para dasmës së saj në Naples. Fustani i saj i gjatë, me një fund të mbuluar plotësisht me pala, u vesh në një mbrëmje elegante në tarracat e Pallatit Mbretëror, duke i dhënë një prekje të veçantë festimeve.

Në një kohë kur individualiteti po vlerësohet gjithnjë e më shumë, fustani i verdhë i nusërisë po shndërrohet në simbol të guximit dhe stilit personal një zgjedhje që pritet të dominojë sezonet e ardhshme të dasmave.