Në edicionin e vitit 2026 të Academy Awards, një trend i ri mode tërhoqi vëmendjen e publikut dhe mediave: ekspozimi anësor i të pasmeve, duke zëvendësuar pjesërisht trendin e njohur të “ekspozimin e gjoksit”.

Mbrëmja më e madhe e Hollywood-it, e njohur zakonisht për elegancën klasike dhe veshjet konservatore, këtë vit solli një frymë më të guximshme dhe eksperimentale. Aktorja Renate Reinsve, e nominuar për rolin e saj në filmin Sentimental Value, u shfaq me një fustan minimalist nga Louis Vuitton. Fustani i kuq, i ndërtuar nga një copë e vetme pëlhure, krijonte një çarje të lartë në pjesën e ijeve, duke theksuar linjat e trupit dhe duke lënë të dukshme pjesë të siluetës.

Një qasje të ngjashme kishte edhe Gwyneth Paltrow, e cila veshi një fustan rozë të zbehtë nga Armani Privé. Dizajni me panele të strukturuara dhe rrjetë transparente i jepte veshjes një efekt modern dhe të guximshëm.

Ndërkohë, festa e përvitshme e Vanity Fair Oscars Party u kthye në një paradë edhe më të theksuar stili. Supermodelja Heidi Klum zgjodhi një fustan të verdhë me detaje transparente nga Chrome Hearts, ndërsa Keke Palmer u dallua me një fustan kadifeje vjollcë nga Gucci, me prerje në pjesën e ijeve që zbulonin një pjesë të lehtë të siluetës së pasme.

Megjithatë, ishte Devon Lee Carlson ajo që tërhoqi më shumë vëmendje. Fustani i saj në ngjyrë shampanjë nga Saint Laurent, me një çarje asimetrike të thellë, ekspozonte jo vetëm këmbën, por edhe një pjesë të konsiderueshme të të pasmeve, duke e kthyer atë në një nga paraqitjet më të komentuara të mbrëmjes.

Kështu, Oscars 2026 nuk ishte vetëm një festë e kinemasë, por edhe një deklaratë e re mode, ku ekspozimi anësor i të pasmeve u shndërrua në trendin kryesor të tapetit të kuq.