Shqipëria mund të jetë destinacioni i radhës më i madh mesdhetar, ka thënë shefi i kompanisë më të madhe të pushimeve në Evropë.

“Është një vend i mrekullueshëm.”, tha Sebastian Ebel, shefi ekzekutiv i Tui, për The Independent.

“Unë jam një fans i madh i Shqipërisë dhe mendoj se duhet dhe mund të bëjmë më shumë. Është në agjendën tonë ta shikojmë atë. Mendoj se perspektiva është e madhe dhe nuk do të habitesha nëse fillojmë një program të rëndësishëm atje.”

Z. Ebel zbuloi se 10 vjet më parë, kur iu bashkua bordit ekzekutiv në Tui, ai kishte menduar mundësinë për të nisur pushimet në Shqipëri

“Unë nuk i binda dot njerëzit të investonin atje.”, tha ai.

Aktualisht, i vetmi operacion i Tui në Shqipëri është një fluturim dy herë në javë nga dega belge e kompanisë nga Brukseli në Tiranë. Në krahasim, linjat ajrore buxhetore tani kanë një program masiv nga Mbretëria e Bashkuar. Ryanair dhe Wizz Air kanë secila nga tre fluturime ditore për në Tiranë nga qendrat e tyre në Londër, përkatësisht Stansted dhe Luton.
Ryanair gjithashtu fluturon nga Birmingham, Bristol, Mançester dhe Edinburg për në Aeroportin Ndërkombëtar Nënë Tereza. Marlene dhe Bernard Kayley, nga Preston, sapo janë kthyer nga një udhëtim në Shqipëri. Ata thonë se kanë kaluar pesë ditë të mrekullueshme. Ata e ndanë kohën mes kryeqytetit dhe Durrësit. Përsa i përket Durrësit zonja Kayley tha se kishte plazh të bukur e të pastër. “Shefi i hotelit ku qëndruam na servirte çdo natë ushqime tradicionale shqiptare, jo nga menyja, ai na pyeti çfarë na pëlqente. Ne do të kthehemi patjetër në Shqipëri!”
Në dhjetor, ministrja e Turizmit të vendit, Mirela Kumbaro, tha për The Independent: “Ne synojmë një turizëm të nivelit të lartë në Shqipëri”. Ministrja tha se ajo “po kërkon hotele me katër dhe pesë yje me emra të markave ndërkombëtare.”

Nga të gjitha vendet e Evropës Lindore, Shqipëria duroi periudhën më të gjatë dhe më shtypëse gjatë komunizmit në pjesën e fundit të shekullit të 20-të. Pothuajse asnjë turist nuk u lejua ta vizitonte Shqipërinë gjatë diktaturës staliniste 40-vjeçare të Enver Hoxhës.
Por një kompani e vogël në atë kohë, Regent Holidays, filloi të çonte vizitorë nga Britania e Madhe në vitet 1970. Ish-drejtori Neil Taylor kujton: “Gjatë viteve 1970 dhe 1980 dërgonim rreth 12 grupe në vit atje. Diversiteti i klientelës ishte apeli i madh. Ne, ndoshta shumë keq, reklamuam në Daily Telegraph dhe në Morning Star për të siguruar që njerëzit që normalisht nuk do t’i kishin dhënë kohën njëri-tjetrit, papritmas duhej të mblidheshin në një grup të ngushtë për 10 ditë. Ne kishim të pasurit që nuk punonin që duhej të shihnin se për çfarë ishte komunizmi, kishim akademikët që vinin re çdo fjalë që thuhej dhe blinin çdo botim në anglisht dhe kishim revolucionarët e egër të vendosur për të gjetur parajsën në Shqipëri dhe për ta imponuar atë në Britani kur ata u kthyen”, thotë Taylor.