Aktorja Rajmonda Bulku ka rrëfyer detaje nga roli i saj në filmin Zonja nga qyteti, krah aktores së njohur Violeta Manushin.

Bulku tregon se në ditën e parë të xhirimeve, një prej fjalive që ajo e mban mend edhe sot nga aktorja ka qenë: Ti je bija ime.

“Që natën e parë, ishte vërtetë filmi i dytë, por sidoqoftë ishte një rol më kryesor se sa tek “Dimri i fundit” dhe Violetës me siguri i thanë që kjo është një vajzë gjimnaziste. Violeta më ftoi në dhomë dhe që natën e parë kemi fjetur të dyja tek Turizimi i vjetër i Pogradecit dhe më thotë që ti je bija ime dhe mbetëm kështu deri në fund.

Fjala bija ime ishte deri në momentet e fundit, i kemi thënë njëra-tjetrës që të dua shumë vërtetë dhe unë i kam thënë që të dua shumë. Deri në momentin e fundit kur ishte në spital kam qenë pranë saj. E dija që ajo grua ishte një mrekulli, një karakter shumë i bukur, një artiste e jashtëzakonshme dhe isha krenare që e kisha mike të vërtetë. Në dasmën time ka qenë e ftuar në tavolinë dhe automatikisht si grua e zgjuar tha, “tani unë jam nëna e tretë” se erdhi vjehrra”, rrëfeu aktorja në Kurthin e Piter Panit.