Një hulumtim i fundit tregon se suplementet e vajit të peshkut rrisin rrezikun për sëmundje të zemrës ose goditjes në tru. Por mund të zvogëlojë rrezikun për ata që janë diagnostikuar me sëmundje kardiovaskulare, pasi është një burim i pasur i acideve yndyrore omega-3. Një ekip studiuesish në Kinë, SHBA, MB dhe Danimarkë monitoruan më shumë se 400,000 qytetarë për 12 vite për të vlerësuar ndikimin që ka ky suplement në zemër, goditjen në tru dhe vdekjen tek personat që nuk kanë shfaqur probleme kardiovaskulare.

Ata gjithashtu vlerësuan nëse këto suplemente ndikonin në përparimin e sëmundjeve të zemrës. Botuar në revistën BMJ Medicine, studimi zbuloi se për personat pa sëmundje kardiovaskulare, përdorimi i rregullt i suplementit u shoqërua me një rrezik të rritur prej 13% të zhvillimit të fibrilacionit atrial dhe një rrezik të shtuar 5% për goditjen në tru.

Për pacientët me sëmundje të zemrës, suplementet e vajit të peshkut u shoqëruan me një rrezik 15% më të ulët për të përparuar nga fibrilacioni atrial në një atak në zemër dhe një rrezik 9% për vdekjen. Kishte gjithashtu një efekt pozitiv më të madh për të moshuarit me sëmundje ekzistuese të zemrës duke ulur në 11% rrezikun.

Tracy Parker, dietologe tha: “Ky hulumtim nuk duhet të jetë shqetësues për njerëzit që marrin rregullisht suplemente të vajit të peshkut, por nuk është gjithashtu shtysë për të filluar marrjen e tyre për të parandaluar sëmundjet e zemrës dhe të qarkullimit të gjakut. Suplementet si acidet yndyrore omega-3 nuk janë zëvendësues i një dietë të shëndetshme. Dieta tradicionale mesdhetare është treguar herë pas here se zvogëlon rrezikun e sulmit në zemër ose goditje në tru. Kjo përfshin më shumë peshk, më pak mish të kuq, shumë fruta, perime dhe drithëra integrale”.