Mbreti i Anglisë Charles dhe gruaja e tij Camilla morën pjesë në ngjarjet që shënuan 80-vjetorin e zbarkimit në Normandi. Çifti mbretëror, si dhe Princi William, morën pjesë në një event në Portsmouth dhe dëgjuan veteranin Eric Bateman të tregonte kushtet e tmerrshme në të cilat u zhvilluan zbarkimet në bregdetin francez më 6 qershor 1944. Mbretëresha u përlot, ndërsa i shoqi e shikonte me emocion.

“Kishte aq shumë anije aleate në Kanal saqë mund të ecje nëpër të.”, tha veterani.

Në fjalën e tij Charles iu referua atyre që luftuan në 1944-ën “me guxim, këmbëngulje dhe solidaritet. Ne do t’u jemi përgjithmonë borxhli këtyre njerëzve.” theksoi Charles, duke shtuar se përpjekjet e këtyre njerëzve për t’i dhënë fund “totalitarizmit barbar” nuk duhet të harrohen kurrë.

Të enjten, Charles do të udhëtojë në Francë në një event ku do të marrin pjesë krerët e shteteve dhe kryeministrat.