Prej kohësh po përflitej se Michelle Obama do të futej në garë përballë presidentit amerikan Joe Biden, por kjo është hedhur nga zyra e ish-zonjës së parë.

“Siç e ka shprehur ish-zonja e parë Michelle Obama disa herë gjatë viteve, ajo nuk do të kandidojë për presidente”, deklaroi zyra, duke e bërë të qartë prej kohësh se të hysh në politikë është një ide e tmerrshme.

Ish-presidenti Barack Obama i pyetur po ashtu nëse vajzat e tij do të përfshiheshin ndonjëherë në politikë, tha: “Kjo është një pyetje që nuk kam nevojë t’i përgjigjem, sepse Michelle i ka shpjeguar se do të ishte çmenduri nëse ato do të merrnin këtë hap. Nuk do të ndodhë kurrë.”

Sigurisht, kjo nuk ishte e vetmja gjë që ish-presidenti tha. Ai vuri në dukje faktin se si Donald Trump, një i dënuar, ka një mundësi për të rifituar Shtëpinë e Bardhë në zgjedhjet e ardhshme.

“Shikoni, një pjesë e asaj që ka ndodhur në vitet e fundit është se ne kemi normalizuar sjelljen që dikur skualifikohej. Ishte një kohë kur ne kishim disa vlera thelbësore me të cilat ishim dakord. Ne besuam në ndershmërinë themelore”, tha Obama.